人同體系喺社會嘅建構

The art of narrative practice(敍事實踐)


究竟人係點樣睇自己嘅呢?

係一出世已經好明白好清楚自己,定係有人話俾佢聽佢係一個點樣嘅人?


究竟人係點樣決定自己係一個點樣嘅人?

係一出世已經決定咗?有無得改變嘅呢?還是由細到大嘅教育、累積嘅經歷而一步一步演變出嚟?哩啲教育 “經驗、同經歷” 又係被安排還是自己有得揀㗎?

建構社會
“人並不是問題,問題本身才是問題。”

根據敍事治療 (Narrative Therapy) 創始人 Michael White 嘅講述,問題係由社會建構出嚟嘅,人點樣去睇自己點樣理解自己、喺生命和生活上產生出嚟嘅問題困擾等等都係由社會建構出嚟。

建構嘅系統制度下,人有機會慢慢失去自我認知自我認識嘅能力,因為不斷被建構嘅訊息概念入侵自己嘅意識裏面,如果自我反思自我反醒嘅意識減弱或者無被提升,就會成為被建構下嘅其中一個附屬體,慢慢失去屬於「自己」嘅獨立性、獨特處,不自知下繼續順應和依賴建構體系嘅掌握操控,再無法獨立支撐一個屬於自己嘅真實自我。


繼續處於哩啲被操控嘅訊息和概念下,人就漸漸失去自己嘅思考判斷,社會上好多關於人嘅精神、狀態、能力、價值都被統一化標籤化,當個體同市場所定嘅建構框架有出入、產生衝擊時,好多時會被評斷或標籤為不良、錯誤、問題、病態等等,需要被整頓、診症或醫治;當自己嘅身體精神心靈健康無法自強自立時,就會影響工作和生活能力,社交、情感關係、處理事情能力等失去協調,於是就要睇醫生,變成病人,變成弱勢,付上昂貴金錢、心、力去醫治。


往往當人去到求助治病階段,就會對自己嘅能力產生懷疑,對身處環境或面對事情會出現擔心或對自己產生不信任;就因為唔再相信自己有能力,將自己一直累積和擁有嘅經驗經歷價值都埋藏了,哩個「被」處於弱勢嘅自己,認為自己出現咗問題,認同自己係一個「有問題嘅人」。


喺咁嘅時候,影響住自己嘅「問題」已經內化咗,以為哩啲「問題」係自己潛藏嘅內在本性。人處於哩個狀況會很難將困難轉變,因為要處理「有問題的自己」,係一個非常大而且複雜嘅部分。


總結嚟講,如果失去自我思考嘅空間、放棄自我反醒嘅機會、依賴人云亦云嘅社會建構系統,人就會逐漸失去自身獨特性、弱化自我價值;如果不自覺地將人與問題扣在一起,就會令人變得更無力。



資訊連結

White, M. (Summer, 1989/1997). The externalization of the problem and re-authoring of lives and relationships. Dulwich Centre Newsletter (pp. 3-20). Reprinted in M. White & D. Epston, Retracing the past: Selected papers and collected papers revisited. Adelaide, Australia: Dulwich Centre Publications.


White, M., & Epston, D. (1990). Narrative means to therapeutic ends. New York: W.W. Norton.

  • phoTALK YouTube
  • phoTALK IG
  • phoTALK Blogger
  • phoTALK Facebook

© 2020 by phoTALKgraphy. All Rights Reserved.